نصائح ذهبيه لحياة زوجيه سعيده ♥️

من أوائل الحاجات اللي لازم تتفقوا عليها وتحطىها في دستور حياتكم الزوجيه هي جملة واضحة محدده بتقول ( مفيش حاجه اسمها طلاق )

انا عارف ان الطلاق هو نهاية المطاف واخر الطريق ، لكن خطواته للأسف بتكون حاجات صغيره وبعدين تكبر

أوله بيكون خناقه صغيره وبعدين خناقه اكبر شويه وبعدين أنا عاوز اطلق وبعدين والله هطلقك وبعدين يقع الطلاق

ما ينفعش يكون الطلاق وارد في دماغنا أصلا عشان ما يكونش لبانه سهله بنستعملها على الفاضي والمليان، لازم نخلي الكلمه دي خط أحمر مش بنوصلها إلا في حالة ان الأمور وصلت لذروتها واتعقدت وساعتها بيكون حادث جلل وصعب

حافظوا على بيوتكم، ووجهوا طاقة التفكير في الطلاق في طاقة تانيه تفكروا فيها في الحلول لمشاكلكم بدون ما تلجأو للخط الأحمر دا

تفسير بعض الكلمات والمفاهيم اللي بتقولها المرأة للرجل 🙂

أما تقولك ( انت مش بتحبني )

ده معناه انها بتقولك حبني و عاوزه منك مزيد من الحب والاهتمام

أما تقولك ( مش عاوزه اكلمك )

ده معناه انها عاوزاك تتكلم معاها اكتر وتسمعها أكتر

أما تقولك ( أنا بكرهك ) 

فهي بتقوك أنا بحبك أوي … هي كده 😂

أما تقولك ( انت عمرك ما خرجتني ولا فسحتني ) رغم انك بتكون لسه مخرجها من كام يوم 

فده معناه انها بتقولك انا عاوزه اكون معاك وعاوزاك تخرجني

أما تقولك أى جمله بتبدأ ب ( إنت عمرك ما )

فإنت ما تاخدهاش بالشكل المنطقي لإنها بتعبر بجملتها دي عن الوقت الحالي فقط ولكن بطريقتها هي

لازم تبقى فاهم ان مشاعر المرأه وتعبيراتها ولغتها مختلفة عنك كرجل فلو ما فهمتش لغتها واتعاملت معاها كواحد صاحبك هبتبوظ كل حاجه … اتعامل معاها بلغتها وافهمها 🙂

اختارتوا بعض … اتخطبتوا … اتجوزتو .. مبروووك 😊

فيه بقى شوية حاجات خلو بالكم منهم عشان ربنا يكرمكم والبيت يعمر وما يقعش

ـــــــــــــــــــــ

1- ما بقاش اسمها ( أنا )، بقى اسمها ( إحنا ) انتو دلوقتي اتنين مش واحد 

2- مفيش حاجه اسمها أنا كده وهفضل كده ومش هتغير، اسمها هنحاول نقرب لبعض ونغير الوحش اللي فينا عشان نكون أفضل وأحسن 

3- الكلمه الطيبه بتفرق كتييير جدا، عملت حاجه حلوه قولها شكرا

جاى من شغله تعبان، قوليله ربنا يكرمك وكتر خيرك … الكلمة الطيبه بتعمل اثر حلو اوي اوي 

4- مشاكلكم لازم تفضل في بيتكم، مشكلتكم لو خرجت برا بيتكم بدون داعي هتبقى وبال عليكم

5- الحياه صعبه والضغوط كتيره، خففوا على بعض واسندوا بعض، بيتكم المفروض يكون المكان اللي بتشعروا فيه بالأمان والراحه مش مكان جديد للضغوط

6- بلاش كلام سلبي، بلاش احكام دايمه على بعض، بلاش تعميم وبلاش تلقيح كلام 

7- ما ينفعش تباتوا في يوم واحد مضايق، لما بتحصل مره بتتكرر 1000 مره وبعدها بيكون عادي انكم تقعدوا بالأيام مش بتتكلموا 

8- انتوا مش اعداء، انتو بتكملو بعض، كل واحد لازم يتنازل شويه ويحاول يقرب شويه، مره تصالحها ومره تصالحك، عادي تحصل مشاكل بس لازم بعدها نحلها ونتصافي

9- ما تحطوش للسعاده شروط كتيره تخليها صعبة المنال، عودوا نفسكم على البساطه وعلى إنكم تستمتعوا بأقل حاجه وبكل حاجه 

10- اعملوا ذكريات حلوه بينكم، بتفرق كتير في مسيرة عمركم وحياتكم 

ربنا يسعدكم ويفرح قلوبكم 👍😃

هل الحب بيموت وبيدبل بعد الجواز وبيحل محله مشاعر الزهق والملل والرغبه في الطلاق ؟؟

ــــــــــــ

عشان نجاوب كويس على السؤال ده، لازم في الأول نجاوب على سؤال أهم وهو يعني ايه جواز اصلا ؟؟

مش عاوز اخش في كلام مكلكع ونظري ولكن بشكل بسيط اقدر الخص الاجابه في الاتي :

1- الجواز بالنسبة ليا هو السكن في وقت العاصفه والموده والرحمه في كل وقت، شفت سيدنا محمد لما نزل عليه جبريل في الغار وبعدها وصل للسيده خديجه وقالها ( دثروني دثروني ) ولم يهدىء من روعه غير كلماتها ووقوفها جنبه، اهو ده السكن اللي بعتقد انه اساس في الزواج، انك تلاقي اللي تسكن اليه عشان تشكيله همك او يشاركك فرحك وحزنك، اللي يطبطب عليك ويدعيلك ودايما في ضهرك .

لو ما حيستوش انكم سكن لبعض وان فيه موده ورحمه بينكم يبقى مفيش حب .

2- الجواز بالنسبه ليا هو الإحساس بالأمان، الموضوع ده مش عند المرأه بس ولكن كمان عند الراجل بس المرأه بيكون عندها اشد

المرأه بتحب تحس انها مطمنه على نفسها وعلى حياتها وانها عايشه مع واحد بيحفظها وبيحافظ عليها، بيفرج اوي اوي معاها الموضوع ده

لكن الراجل برضو بيحب يشوف الأمان ده مع مراته، بيحب يشوفها جدعه معاه، بتحس بيه وبتطمنه دايما مش بتقلب الدنيا في وشه وفي حياته 

لو احساس الأمان بين الاتنين مش موجود يبقى مفيش حب .

3- الجواز بالنسبه ليا هو المشاركه والأحلام المشتركه وشركة العمر الجميله

لازم يكون فيه احلام مشتركه بتعيشوها وبتكبر معاكم كل يوم، لازم تكونوا بتتشاركوا في كل حاجه في حياتكم حلوها ومرها، لازم تكونوا بتحلموا مع بعض وبتتشاركوا في تنفيذ احلامكم مع بعض وبتنطلقوا مع بعض، بتعدوا عثرات حياتكم مع بعض وبتعيشوا افراحكم ونجاحتكم مع بعض، لازم شركتكم تكون بتكبر وكل شريك فيها بيعمل اللي عليه واكتر والا الشركه هتقع وهتدمر 

لو مفيش احلامك مشتركه ولا مشاركه ولا حوار بينكم يبقى مفيش حب 

ـــــــــــــــــــــــــــ

دول مجرد 3 حاجات بس من الحاجات اللي بيعنيها الجواز بالنسبه ليا وبالتالي من وجهة نظري لو الحاجات دي مش موجوده يبقى انتفت الاسباب اللي بيعيش بيها الزواج وبيكبر بيها الحب وبتحل محلها وبكل اسف اسباب تانيه اساسها الطلاق والانفصال والتعاسه 

الجواز هو ميثاق غليظ وسكن ورحمه وموده وشراكة العمر كله، عيشوه كده هتستريحو كتير 🙂

رحمَ الله رجلاً تحمل تقلبات زوجته النفسية ، فصبرَ و هوّن و قَدر ..😍

رحمَ الله رجلاً ترك لذة نومه ليجبر كسر امرأته بـ كلمةٍ طيبة و ابتسامةٍ هادئة و لمسةٍ حانية ..

طوبى له حين ينظر إلي عتمة وجهها فيُخرجها من ضيق نفسها إلى فضاء قلبه فـ تُشرق من جديد. 

سلامُ الله علي رجلٍ استمع بـ قلبهِ لهذيان زوجته، و كلماتها المبُعثرة و أفكارها المشتتة و ترددات قراراتها .. فساندها و طمأنها و جمع عليها شتاتها.

بارك الله في قلبِ رجل عرفَ معني القوامة و الرجولة ، فكان رجلاً لزوجتهِ لا عليها 

يُأنس وحدتها ، و يعيَّ نظراتها ، و يحتضن دموعها ، و يجبر ما بقلبها من كسور ..

هنيئاً لـ زوجة قد تقبلَ الله دعوة أبويها فرُزقت بخير رجل اقترن اسمه بـ الحَسنِ في الخِصال و الأفعال

هنيئاً لها إذا وجدت من يَقبلها علي عِلاتها ، فيري فيها كل الخير و يرضي بـ إعوجاجها ..

هنياً لها إذا وجدت من يسكن قلبها حين تُحدثه ، و تهدأ روحها حينَ تُجالسه 

باركَ الله في بيتٍ عمرَّهُ رجلٌ بتقواه ، و زانته امرأة بخُلقها

و باركه الله بالمودة والرحمه لهما

ممكن جد نقلل نسبة الطلاق لو اخترنا من البدايه صح، وده ممكن يحصل بشوية حاجات

١- إنك ما تقبليش أى حد لمجرد إن سنك بقى كبير، أو انه بقى فيه ضغط عليكي من أهلك أو انك عاوزه تخلصي وخلاص، ممكن تخلصي فعلا بس لو اختارتي او رضيتي بأى حد والسلام هتلبسي فيه.

٢- انك ما تختارهاش بناءا على معايير ظاهريه والكلام للبنت كمان، ممكن جدا تكون جميله جدا ومتدينه وكل حاجه ولكن فعليا مش مناسبه ليك ومش هتقدروا تتأقلموا مع بعض، نفس القصه ممكن هو يكون حد محترم جدا وكويس جدا لكنكم مش هتنسجموا مع بعض، لازم تعرفوا كويس أوي قبل ما نبدأ اصلا هل احنا لايقيين لبعض وهنعرف نتفاهم ونتفق مع بعض ولا لاء

٣- ( أنا كده وهفضل كده ومش هتغير )

دي جملة بتدمر العلاقه الزوجيه قبل بدايتها فعليا، الجواز شركه انت بتفتحها وكل يوم فيه تغيرات بتحصل في الشركه لو فضلت جامد وصلب الشركه هتخسر والموضوع هيبوظ، أما لو كنت مرن وحاولت تتغير وتشوف ايه الأفضل وارد جدا ان شركتكم تنجح وتذدهر

احنا حاليا بنفكر في حاجه كبيره تتعمل في الموضوع ده، ولكن لحد لما الموضوع يكون جاهز لو حد عنده أى مشكله او استفسار يخص هذا الأمر ممكن يكلمني فورا 👍

الطلاق هو رد فعل ونتيجه لفعل وحاجات معينه

الطلاق هو رد فعل لحاجات كتير غلط بتحصل من البدايه خالص

– من أول فهم الجواز اصلا وفهم الحياه الزوجيه

– من أول الاختيار وهل بنختار صح ولا غلط وهل احنا مناسبين لبعض ولا لاء

– من أول القابليه للتغير والتكيف مع وجود شريك جديد في الحياه

– من اول الاحساس بتحمل المسئوليه عن وجود بيت واولاد.